Գույքահարկի վճարման ժամկետների մասին

«Գույքահարկի մասին ՀՀ օրենքի 3-րդ հոդվածով գույքահարկ վճարող են համարվում ՀՀ-ում և օտարերկրյա պետություններում ստեղծված կազմակերպությունները, միջազգային կազմակերպությունները, ՀՀ քաղաքացիները, օտարերկրյա քաղաքացիները, որոնց ՀՀ տարածքում պատկանում է հարկվող օբեյկտ համարվող գույքը (շենքեր, շինություններ և փոխադրամիջոցներ):

Նույն օրենքի 9-րդ հոդվածով, կազմակերպությունների համար գույքահարկի հաշվետու ժամանակաշրջան է համարվում հաշվետու տարվա եռամսյակը, իսկ գույքահարկի հաշվարկների ներկայացման ժամկետը` եռամսյակին հաջորդող ամսվա 1-25-ը ներառյալ, այսինքն`

• 1-ին եռամսյակ – ապրիլի 1-25-ը (վճարումները` մինչև մայիսի 1-ը)
• 2-րդ եռամսյակ – հուլիսի 1-25-ը (վճարումները` մինչև օգոստոսի 1-ը)
• 3-րդ եռամսյակ – հոկտեմբերի 1-25-ը (վճարումները` մինչև նոյեմբերի 1-ը)
• 4-րդ եռամսյակ – հունվարի 1-25-ը (վճարումները` մինչև փետրվարի 1-ը)

Գույքահարկի հաշվարկները ներկայացնում են հարկվող օբյեկտի գտնվելու վայրի տեղական ինքնակառավարման մարմին:

Սույն օրենքի 9-րդ հոդվածի պահանջները խախտելու դեպքում կազմակերպությունից գանձվում է տուգանք, հաշվարկի ներկայացման ժամկետին հաջորդող յուրաքանչյուր 15 օրվա համար գույքահարկի գումարի 5%-ի չափով, բայց ոչ ավելի գույքահարկի ընդհանուր գումարից:

Գույքահարկի եռամսյակի գումարը սահմանված ժամկետից ուշ վճարելու դեպքում, յուրաքանչյուր օրվա համար հաշվարկվում է 0,15% տույժ: