ՎԱՐՉԱԿԱՆ ՇՐՋԱՆԻ ՂԵԿԱՎԱՐԻ ԱՇԽԱՏԱԿԱԶՄԻ ԿՈՄՈՒՆԱԼ ՏՆՏԵՍՈՒԹՅԱՆ ԵՎ ԲԱԶՄԱԲՆԱԿԱՐԱՆ ՇԵՆՔԵՐԻ ԿԱՌԱՎԱՐՄԱՆ ՄԱՐՄԻՆՆԵՐԻ ՀԵՏ ԱՇԽԱՏԱՆՔՆԵՐԻ ԿԱԶՄԱԿԵՐՊՄԱՆ ԲԱԺԻՆ

ԷՐԵԲՈՒՆԻ ՎԱՐՉԱԿԱՆ ՇՐՋԱՆԻ ՂԵԿԱՎԱՐԻ ԱՇԽԱՏԱԿԱԶՄԻ ԿՈՄՈՒՆԱԼ ՏՆՏԵՍՈՒԹՅԱՆ ԵՎ ԲԱԶՄԱԲՆԱԿԱՐԱՆ ՇԵՆՔԵՐԻ ԿԱՌԱՎԱՐՄԱՆ ՄԱՐՄԻՆՆԵՐԻ ՀԵՏ ԱՇԽԱՏԱՆՔՆԵՐԻ ԿԱԶՄԱԿԵՐՊՄԱՆ ԲԱԺՆԻ

1. ԸՆԴՀԱՆՈՒՐ ԴՐՈՒՅԹՆԵՐ

Սույն կանոնադրությունը սահմանում է Էրեբունի վարչական շրջանի ղեկավարի աշխատակազմի կոմունալ տնտեսության և բազմաբնակարան շենքերի կառավարման մարմինների հետ աշխատանքների կազմակերպման բաժնի գործունեության կարգը, հիմնարար խնդիրները, իրավունքները, պարտականությունները և պատասխանատվությունը:

Բաժինն իր գործունեությունն իրականացնելիս ղեկավարվում է ՀՀ Սահմանադրությամբ, օրենքներով, Երևանի ավագանու, Երևանի քաղաքապետի, Էրեբունի վարչական շրջանի ղեկավարի որոշումներով, կարգադրություններով, Էրեբունի վարչական շրջանի ղեկավարի աշխատակազմի և սույն կանոնադրություններով:

2. ԲԱԺՆԻ ԽՆԴԻՐՆԵՐԸ ԵՎ ԳՈՐԾԱՌՈՒՅԹՆԵՐԸ

Բաժինը.

ա/ կազմակերպում է համայնքում կոմունալ տնտեսության, գյուղատնտեսության բնագավառի, ինչպես նաև բազմաբնակարան շենքերի կառավարման մարմինների հետ տարվող աշխատանքները.

բ/ սահմանված կարգով կազմակերպում է բնակարանային և սոցիալական նշանակության, ինչպես նաև համայնքային սեփականություն հանդիսացող այլ օբյեկտների ընթացիկ նորոգման աշխատանքները, կազմակերպում ընթացիկ նորոգման նախագծանախահաշվային փաստաթղթերի կազմումը.

գ/ սահմանված կարգով իրականացնում է անհատական բնակելի տների տեխնիկական վիճակի զննումներ.

դ/ վարչական շրջանում կազմակերպում է աղբահանության գործը.

ե/ կազմակերպում է ինքնակամ հողազավթման և շինարարության կանխումն ու կասեցումը և ձեռնարկում է համապատասխան գործողություններ դրանց հետևանքների վերացման ուղղությամբ.

զ/ քաղաքաշինական գլխավոր հատակագծին և հողերի գոտիավորման ու օգտագործման սխեմային համապատասխան կազմակերպում է կնքված պայմանագրերի համաձայն հողհատկացումը, հատկացված հողերի հետ վերցնելը, վարձակալությամբ տրամադրելը.

է/ ապահովում է համայնքի սեփականություն հանդիսացող բնակելի տների, բազմաբնակարան շենքերի, այդ շենքերում բնակարանների, ոչ բնակելի տարածքների, հանրակացարանների, վարչական շենքերի և այլ շինությունների շահագործումը, սպասարկումը, դրանց ընթացիկ նորոգումը, հաշվառումը և բաշխումը.

ը/ կազմակերպում է բազմաբնակարան շենքի կառավարման մարմինների և համատիրությունների հիմնադիր ժողովները և աջակցում դրանց անցկացմանը, այդ մարմինների ձևավորմանը, համակարգում է բազմաբնակարան շենքի կառավարման մարմինների աշխատանքները.

թ/ ապահովում է համայնքի մասնակցությունը շենքերի սպասարկմանը' իր սեփականությունը համարվող բնակարանների և ոչ բնակելի տարածքների քանակին համապատասխան.

ժ/ կազմակերպում է այն շենքերի սպասարկումը, որոնք չեն կառավարվում համատիրությունների կամ օրենքով սահմանված բազմաբնակարան շենքի կառավարման այլ մարմնի կողմից.

ի/ բազմաբնակարան շենքերի կառավարման մարմինների հետ համատեղ իրականացնում է վերահսկողություն բազմաբնկարան շենքերում պարտադիր նորմերի պահպանման ուղղությամբ.

լ/ բազմաբնակարան շենքերում, համայնքի սեփականություն համարվող շենքերում և շինություններում և նրանց համար տրամադրված սպասարկման ընդհանուր տարածքներում շինարարության և քանդման աշխատանքների համար սահմանված կարգով տալիս է թույլտվության եզրակացություն.

խ/ համակարգում է շենքերի և շինությունների բակային տարածքների բարեկարգման և կանաչապատման աշխատանքները.

ծ/ կազմակերպում է համայնքի սեփականություն հանդիսացող բնակարաններն այդ բնակարանների նկատմամբ օգտագործման իրավունք ունեցող անձանց նվիրատվության պայմանագրով օտարելու նախապատրաստական աշխատանքները.

կ/ կազմակերպում է բազմաբնակարան շենքերի բնակիչների հաշվառումը:

Բաժինը վարչական շրջանի ղեկավարի հանձնարարությամբ իրականացնում է բաժնի գործառույթներից բխող այլ լիազորություններ:

3. ԲԱԺՆԻ ՊԵՏԸ

Բաժինը ղեկավարում է բաժնի պետը:

Բաժնի պետն անմիջականորեն ենթակա ու հաշվետու է Էրեբունի վարչական շրջանի ղեկավարին և աշխատակազմի քարտուղարին:

Բաժնի պետին անմիջականորեն ենթակա և հաշվետու են բաժնի աշխատողները:

Բաժնի պետի բացակայության դեպքում նրան փոխարինում է բաժնի պետի տեղակալը:

Բաժնի պետը.

ա/ կազմակերպում, համակարգում, ղեկավարում և վերահսկում է բաժնի աշխատանքները.

բ/ լուծում է բաժնի խնդիրներն իր իրավասության սահմաններում.

գ/ իրեն անմիջականորեն ենթակա աշխատողներին տալիս է ցուցումներ, հանձնարարականներ.

դ/ բաժնի լիազորությունների սահմաններում նախապատրաստում է առաջարկություններ, տեղեկանքներ, հաշվետվություններ, զեկուցագրեր, միջնորդագրեր, հարցումներ և այլ գրություններ.

ե/ ստորագրում է իր և բաժնի անունից կազմվող փաստաթղթերը.

զ/ ապահովում է բաժնի փոխհարաբերությունները աշխատակազմի այլ բաժինների հետ.

է/կազմակերպում է քաղաքացիների ընդունելություն' բաժնի աշխատանքային բնագավառին վերաբերող հարցերով.

ը/ իրականացնում է օրենքով և այլ իրավական ակտերով նախատեսված այլ լիազորություններ.

4. ԲԱԺՆԻ ԱՇԽԱՏՈՂՆԵՐԸ

Բաժնի աշխատողները.

ա/ իրականացնում են սույն կանոնադրությամբ նախատեսված' բաժնի գործառույթներից բխող աշխատանքներ.

բ/ կատարում են բաժնի պետի հանձնարարականները և անմիջականորեն ենթակա ու հաշվետու են բաժնի պետին.

գ/ սահմանված կարգով մասնակցում են բաժնի պետի կողմից կազմակերպված' քաղաքացիների ընդունելությանը.

դ/ բաժնի պետի հանձնարարությամբ մասնակցում են Հայաստանի Հանրապետության համայնքների և այլ կազմակերպությունների ներկայացուցիչների հետ հանդիպումներին, սեմինարներին, հանդես են գալիս առաջարկություններով, զեկույցներով և այլն.

ե/ պատասխանատվություն են կրում օրենքների, այլ իրավական ակտերի պահանջները չկատարելու կամ ոչ պատշաճ կատարելու համար: